"LINGADJE DI GRAND-LEEZ "  

Tant èt tant

Tant qui m'dimèrerè dès sovenances

A scrîre, à lîre èt à spèpyi,

Tant qu'dji n'so nén d'trop doûce crwèyance

Po n' pus sawè ci qui d' sicrî.

Tant qu'dji n'sèrè nén coût d'alin.ne,

Et plaî-st-à Diè si dj'a co l'fwace,

dji ramoncèlerè totes lès grin.nes,

Po lès rèlîre, lès mète à place.

Tant qu'dj'âre co bon pîd-boun-ouy,

Si dj' so co à min.me dè fé m'bouye,

Tant qui dj'âre mès mwins, mès brès,

C'èst bén d'âzard, mins dji scrîre.

Vêci,j' arèterè mès pinséyes

Djicrwè bén qu' vos doneroz raîson.

Avou m' moncia d' bounès-idéyes,

Dj' areûve tûzé dès-eûrès au lon.

Albert Rousseau.

__________________________________________

Li min.me coleûr

Dji n'avos nén m' moussemint d' dîmègne,

Ni m' bia tchapia come on monsieû.

Aspouyî conte l'angléye dè l' grègne,

Vos m'avoz pris por-on bribeû.

Sins m' veûy, vos, vos-avoz passé

Come li vint passe en tchèssant lès nûléyes,

Sins vos r'toûrner,

Sins veûy rintrer lès prumeurès dinréyès.

Portant, dj'aros tant v'lu,

Dj' aros tant v'lu m'mète à vos trousses, Mins dj' a stî t' nu.

Ni m' purdoz nén por-on minteûr,

Vos tch' fias avîne li min.me coleûr

Qui lès pautes di frumint au mwès d'awous'.

Albert Rousseau.

__________________________________________

Ele n'est plus a r'coneche

Di d'lon, quand dj'apèrcwé l' clotchi

Bén ôt, su lès spales dé l' viladje,

E mi min.me dji sin m' coeur frumeji

Pacôp, one lârme rôle su m' visadje.

C'a stî l' sémedi trêze di févri,

Sin brût, dj'a intré è l'èglije.

A mes ouy...on p'tit paradis,

Mu, qui l'a connu : quinze surprije.

C'èst l' vrai, parêt : on m' l-avot dit

Pa d'zeûs, i nî manque pus qu' dès stwèles.

Sint-Amand èst tot radjon.ni

L'aviêrje ossi ; one djon.ne bauchèle

Contint di vos awé r'vèyu,

Bén néte, bén prôpe, plin.ne d'induljences...

Djé l' dire aus djins qui passenut :

Elle èst bèle l'èglije di m'y èfance.

(Saint Amand patron de la paroisse)

Albert ROUSSEAU

__________________________________________

Dé l'floye

Djè l' pou dîre : sacré non d' godoye,

Au d' triviès dès coches d'on vî sau,

Li solia si bagneûve è l' floye

Sins brût, come onk qu'è-st-à pids d' tchaus

C'est l' vraî ! L' timps èstot dèl pârtîye.

Et d'on plin côp, il a faît bon.

On cârdinal fleûve sès lostrîyes

Tot-en spèpiant l' tièsse d'o  tchèrdon.

Li solia blam'teuve à grands côps

Su l'êwe, one maclote fieûve one rôye.

Duv'nu nawe, nauji, nèyi d' tchaud

Dj'a ralè pa l'pus bleuwe dès vôyes.

Albert ROUSSEAU

__________________________________________

A METE AU CLER

Poqwè a-t-on rastrindu l' dôse

Dès sints qu'èestîne mobilisés.

Dji m' vos l' va dîre : ça c'è-st-ôte tchôse

Avan.n' li drwèt d' mète nosse grin d' sé?

Portant, c'èst l' vraî, dj'î pièd m' latin,

Quand i m' faut fer brûler 'ne tchandèle,

Dji faî l' toû di totes tchapèles,

Dins lès trwès-quârts, gn-a pus rén d' dins.

Vos dîre ci qu' lès sints sont duv'nus,

Dji choûte tot l'monde, lès pîds su têre.

Dimandez-l' à pus malèn qu'mu,

Dji vike tranquille èt dj' vike d'èspwèr.

Albert ROUSSEAU

__________________________________________

SET-ON JAMAIS

Di d' qwè vont-elès causer

Totes cès djins là

Qui n'ont pus rén à fé?

Aler r'bate lès bwès, lès campagnes,

Lès djoûs d'solia, lès djous qu'i ploût. 

Ûser l'fond d'leus culotes su l'dagn,

Po combén d'timps, p'tête jusqu'au d'bout.

On dit: d'mwin, ça îrè p'tête mia,

Plaî-st à Diè mès djins, faut l'admète.

On sè l'dimande èwou ç'qu'on va?

Pâr-çi, pâr-là, gn-a rén qui r'djète.

Albert ROUSSEAU

__________________________________________

TINRES-EURES

A l'longue dè braîre,

Vos-ouy vont ièsse tot-èfuwés.

Qui v's-a-t-on faît po vos displaîre?

Vos, pus bèle qu'on solia d'èsté.

Rawaitîz l'bleuw cadran dè l' vîye

Et choûtez l' tictac du bouneûr,

Vos-ètindroz come èles sonenut

Lès tinrès-eûres.

Et poqwé vos diros-dje : quitefîye,

Mu, qui s' rawaîte dins vos bias-ouy

Quand îs r'lûjenut.

Albert ROUSSEAU

__________________________________________

CA M'PLAÎT DE VEÛY

...li pîsinte qui monte tot doûcemint,

Qui caracole

Come dès-èfants qui vont è scole.

...li vî tch'mèn qui potche iute du ri

Su s'pwèds, à st-auje ;

Et pa plaîji, là qu'il ascauche.

...l'êwe qui r'djiguèle su lès cayaus

Jusqu'à m'fontin.ne,

Et qui spaume mès djôyes èt mès pwin.nes.

Albert ROUSSEAU

__________________________________________

NET D'IVIÊR

Tant qu'vos dârmoz là bén tchôdemint

Dins vos léncous d'mwèlton,

Vos l'avez bèle.

A l'uch, î djale, tot s'bîle, tot s'find,

On-a po d'mander pârdon

Pa d'zos lès stwèles.

Vos v'dispièrtez, et vos chûtez : 

"Est-ce li vint, dijoz mè l'

Ou bén l'bîje qui sofèle"?

"C'est l'nêt qu'èva en s'èdarmant

En fiant sins come li djoû di d'vant".

Albert ROUSSEAU

__________________________________________